بەهۆی تاکڕەوی حزبە عێڕاقیەکانەوە هەرێمێکی تر ڕادەگەیەنرێت

گۆڤەند سەرکەش_خۆر

پەرلەمانتارێكی عێراقی ڕادەگەیەنێت بەهۆی کەمتەرخەمی حکوومەتەکانی عێڕاق و تاک ڕەوی حزبە شیعەکان، خەڵکی بەسڕا بەرەو بەهەرێمبوونی ئەو پارێزگایە هەنگاو دەنێن.
عودەی عەواد پەرلەمانتاری عێراق لەسەر پارێزگای بەسرا بە میدیاكانی وڵاتەكەی راگەیاند كە سوورن لەسەر راگەیاندنی هەرێمی فیدراڵی لە بەسرا و لەمبارەیەوە دەست بە هەنگاونانی كردارەكی دەكەن، گوتیشی ”هۆكارەكەی ئەو زۆردارییانەیە كە حكوومەتی فیدراڵی دەرهەق بە بەسرا ئەنجامی دەدات”، عەواد ئەم قسانەی لە كۆنگرەیەكی رۆژنامەوانیدا كرد و ئاماژەی بەوە دا كە تا ئێستا گوێیان لە هیچ دانوستاندنێك نەبووە لەلایەن حكوومەتەوە لەگەڵ بەسرا بكرێ بۆ بەشی ئەم شارە لە پترۆ دۆلار، هەروەها لەبارەی دەسەڵاتەكانی پارێزگای بەسرا و بەدەنگەوەچوونی داواكارییەكانی دانیشتوانی.
هەروەها پەرلەمانتارەكەی بەسرا پەیامێكی لە ڕێگەی میدیاكانی وڵاتەكەیەوە بە هاووڵاتییانی عێراق دا و گوتی ”ئەوان وا بەرەو راگەیاندنی هەرێمی بەسرا هەنگاو دەنێن، ئومێدەواریشە خەڵكانی باش پشتیوانیان بن و هاوكارییان بكەن، لە داهاتووشدا ئەوانە لەبیر ناكەن كە پشتیوانییان لێ دەكەن”.
بەپێی ئەو زانیاریانەی دەست (( خۆر )) کەوتون ئەو پەرلەمانتارە لە کۆبونەوەیەکدا لەگەڵ هەندێ لە سەرۆک هۆزەکانی پارێزگای بەسڕا ڕای گەیاندوە کە ئەوان چیتر بەرگەی تاکڕەوی حزبە شیعەکان ناگرن و جیاوازی ناوچەیی لەنێوان پارێزگاکان و پێکهاتەکانی عێڕاق دەکەن ، پێیانی ڕاگەیاندوە کە جگەلە بەهەرێمکردنی بەسڕا هیچ چارەسەرێکی تر نیە بۆ پێشکەوتنی ئەو پارێزگایە و دابڕاندنی لە بەڕیوەبەردنی ڕاستەوخۆی بەغدا.

Back to top button