حەیدەر عەبادی چەند جارێك داوای كردووە لە هەولێر پێشوازی لێ بكرێت بەڵام رەتكراوەتەوە

حەیدەر عەبادی، سەرۆك وەزیرانی پێشووی عێراق كە لە ماوەی حوكمڕانییەكەیدا بە كەسێكی شۆڤێنی و دژە هەرێمی كوردستان ناسرابوو، پاش ئەوەی لە ئەنجامی هەوڵەكانی سەركردایەتیی سیاسیی كوردستان، ئەو هەڕەمەی لە خەیاڵی خۆیدا دروستی كردبوو، بوو بە سەراب، بە شەرمەزارییەوە دەیەوێ سەردانی هەولێر بكات. 

بە گوێرەی زانیاریی پشتڕاستكراوە لە ئەندامێكی شاندی هەرێمی كوردستان كە لەم دواییانە سەردانی بەغدایان كردووە، حەیدەر عەبادی داوای لە ئەندامانی شاندەكە كردووە، پاش گەیاندنی سڵاو و ڕێزی بە سەركردایەتیی سیاسیی هەرێمی كوردستان لە هەولێر، خواستی ئەو بۆ نزیكبوونەوەی لە كورد پێ ڕابگەیەنن. 

هەمان سەرچاوە ئەوەشی ئاشكرا كرد كە عەبادی بە راشكاوی گوتوویەتی كە ئەگەر بزانێت لە هەولێر هەر بەرپرسێك پێشوازی لێ دەكات، ئامادەیە سەردانی هەولێری پایتەختی هەرێمی كوردستان بكات و هەوڵی ئاساییكردنەوەی پەیوەندییەكانی بدات. 

بەپێی زانیارییەكان، ئەو كەسەی عەبادی داواكارییەكەی لێكردووە، پاش گەڕانەوەی بۆ هەولێر، لەمبارەیەوە لەگەڵ چەندان بەرپرسی باڵا گفتوگۆی كردووە، بەڵام دواتر ناچار بووە پەیوەندی بە عەبادییەوە بكات و پێی بڵێت كە هیچ دەرگایەك لە هەولێر بە ڕوویدا ناكرێتەوە. 

حەیدەر عەبادی لە ماوەی سەرۆكایەتیكردنی ئەنجوومەنی وەزیرانی عێراق، لە چوارچێوەی پیلانگێڕییەكانی ١٦ی ئۆكتۆبەر كە لاهوور تلیاكچی و تاقمی خیانەتی ١٦ی ئۆكتۆبەر تێیدا بەشدار بوون، خەونیان بە داگیركردنی هەولێری پایتەختەوە دەبینی، بەڵام لە پردێ و مەحموودییە و مەخموور و سحێلا، خەونەكەیان زڕا و پاش سەدان كوژراوی میلیشیاكانی حەشدی شەعبی، بە شەرمەزارییەوە ئاڵای سپییان هەڵكرد و داوای گفتوگۆیان لە هەولێر كرد.

Back to top button