دەستەی وەبەرهێنان: ئەمساڵ 33 پڕۆژە مۆڵەتیان پێدراوە

دەستەی وەبەرهێنانی هەرێمی کوردستان دوایین ئاماری پێدانی مۆڵەتی بە پڕۆژەکانی بڵاوکردەوە، بەپێی ئامارەکە، ئەمساڵ مۆڵەت بە 33 پڕۆژە دراوە بە سەرمایەی 894 ملیۆن و 758هەزار دۆلار لە حەوت سێکتەری جیاواز و لەم کابینەیەش 277 پڕۆژەی وەبەرهێنان جێبەجێ کراون.

لە ئامارێکی دەستەی وەبەرهێنان ڕایگەیاندوە: لە 1/1/2023 تا 3/8/2023 دەستەی وەبەرهێنان مۆڵەتی بە 33 پڕۆژە داوە، هەشت پڕۆژەی بازرگانین، دوو پڕۆژەی تەندروستی، 11 پڕۆژەی پیشەسازی، 2 پڕۆژەی گەشتیاری، 2 پڕۆژەی فێرکردن، 1 پڕۆژەی کشتوکاڵ و حەوت پڕۆژەی نیشتەجێبوون، سەرجەمیان 33 پڕۆژەن.

هەر لەنێو ئامارەکەدا هاتووە: ئەو پڕۆژانەی لەلایەن دەستەی وەبەرهێنانی هەرێمی کوردستان مۆڵەتیان پێدراوە بە سەرمایەی 894 ملیۆن و 758 هەزار دۆلار بووە و پڕۆژەکانیش لەسەر ڕووبەری هەزار و 673 دۆنم زەوی جێبەجێ دەکرێن.

ئەمەش لە کاتێکدایە ، لە کابینەی نۆیەمی حکوومەتی هەرێمی کوردستان 277 پڕۆژەی وەبەرهێنان جێبەجێکراون کە سێ دانەیان بیانی و ئەوانەی دیکەش خۆماڵین.

Back to top button