دەستەی وەبەرهێنان : بە دووڕێگا ئاسانکاری بۆ وەبەرهێنەران دەکەین

سەرۆکی دەستەی  وەبەرهێنان لە هەرێمی کوردستان ئاشکرایکرد: ئێمە وەکو دەستەی وەبەرهێنان لە هەرێمی کوردستان ئاسانکاری تەواو بۆ ئەو وەبەرهێنەرانە دەکەین پڕۆژەی وەبەرهێنان لە هەرێمی کوردستان ئەنجام دەدەن، ئەمەش وەکو هاندانێک بۆ ئەوەی پڕۆژەی زیاتری گەشتیاری لە هەرێمی کوردستان جێبەجێ بکرێن .

دکتۆر محەمەد شوکری ، سەرۆکی دەستەی وەبەرهێنان لە هەرێمی کوردستان ، ڕایگەیاند: ئێمە ئاسانکاری تەواو بۆ هەر وەبەرهێنەرێکی بیانی دەکەین کە بیەوێت لە ڕێگەی نەخشەڕێگای گەشتیارییەوە  گەشتوگوزار لە هەرێمی کوردستان بکات، لە باجی گومرگی دەبەخشرێن و هەرچی ئاسانکاریش پێویستە لە پڕۆژەکان بۆیان دەکرێت بۆ هاوردەکردنی کەلوپەلی گەشتیاری بۆ شوێنەکانیان، ئەمەش بۆ ئەوەی وەبەرهێنەران هان بدرێن زیاتر پڕۆژەی گەشتیاری لە هەرێمی کوردستان ئەنجام بدەن.

دکتۆر محەمەد شوکری گوتیشی: لەیاسای وەبەرهێنان ئاسانکاری زۆرکراوە بۆ وەبەرهێنەران کە پڕۆژەی گەشتیاری ئەنجام دەدەن، ئەوانیش دوو جۆرن، یەکەمیان بەخشینیان لە گومرگ و باج، ئەوەی دووەمیش بەخشینیانە لە هەر سێ ساڵ جارێک وەبەرهێنەر و خاوەن پڕۆژە گەشتیارییەکان سەرجەم کەلوپەل و پێویستی شوێنە گەشتیارییەکان بەبێ گومرگ بێنن بۆ ناو هەرێمی کوردستان، بۆ ئەوەی شوێنەکانیان نوێ بکەنەوە و خزمەتی گەشتیاری پێبکەن، ئەمەش تایبەتە بە کەرتی گەشتیاری کە لە یاسای وەبەرهێنان ئاماژەی پێ کراوە.
کابینەی نۆیەمی حکوومەتی هەرێمی کوردستان گرنگیەکی تایبەت بە کەرتی گەشتیاری دەدات، لەماوەی ئەم کابینەیە چەندین پڕۆژەی گەورەی گەشتیاری کراونەتەوە و بەرەوام گەشتیاری زۆری ڕوو لە هەرێمی کوردستان دەکەن و ژمارەشیان بەردەوام لە زیادبوون دایە.

Back to top button