د. ڤیان سەبری: پەیامی پارتی و سەرۆک بارزانی گەیەندرایە حکوومەتی بەغدا و لایەنە عێراقییەکان

سەرۆکی فراکسیۆنی پارتی دیموکراتی کوردستان لە پەرلەمانی عێراق گوتی: شاندی پارتی دیموکراتی کوردستان لە سەردانەکەیان بۆ بەغدا پەیامی پارتی و سەرۆک بارزانییان بە حکوومەت و لایەنەکان گەیاند، گوتیشی: دوای دەرکردنی ڕێنماییەکانی یاسای بودجە وسەردانی شاندی حکوومەتی هەرێم بۆ بەغدا، پێویستە لەمەودوا مانگانە پشکی هەرێمی کوردستان بەپێی یاسای بودجە ڕەوانە بکرێت.

سەرۆکی فراکسییۆنی پارتی دیموکراتی کوردستان لە پەرلەمانی عێراق، د.ڤیان سەبری، بۆ ماڵپەڕی فەرمیی پارتی دیموکراتی کوردستان گوتی: چوونی شاندی پارتی دیموکراتی کوردستان بۆ بەغدا زۆر گرنگ و پێویست بوو، شاندەکە لەمیانەی سەردانەکەی بۆ بەغدا پەیامی پارتی دیموکراتی کوردستان  و سەرۆک بارزانییان  گەیاندۆتە حکوومەت، هاوپەیمانی ئیدارەی دەوڵەت و لایەنەکان، چاوەڕێی ئەنجامەکەی دەکەین، چونکە شاندەکە ڕۆژی پێنجشەممەی ڕابردوو گەڕاونەتەوە هەرێمی کوردستان.

لەبارەی ناردنی پشکی هەرێمی کوردستانیش لە بودجە، د. ڤیان سەبری گوتی، دوای بڵاوبوونەوەی  ڕێنماییەکانی جێبەجێکردنی یاسای بودجە و دوای چوونی شاندی حکوومەتی هەرێمی کوردستان بۆ بەغدا و ڕادەست کردنی نەوت و داهاتە نانەوتییەکان پێویستە لەمەودوا بەغدا مانگانە بەشە بودجەی هەرێمی کوردستان، چۆن لە یاسای بودجە ئاماژەی پێکراوە بەو شێوەیە ڕەوانەی بکات.

Back to top button