رێڤینگ هروری: حوكمه‌تا عیراقێ ب هیچ شێوه‌كی پاراستنا سنوران كو كارێ وێ یه‌ ب به‌رپرسیاره‌تیا خوه‌ نه‌زانی یه‌

ل دۆر هێرشێن ڤێ دووماهیێ یێن فرۆكێن توركی بۆ سه‌ر چیایێ (زنارا كێسته‌) ل ناحیا كانی ماسێ و به‌لاڤكرنا سه‌ربازێن توركی ل سه‌ر وی چیای و توپبارانكرنا به‌رده‌وام یا ده‌ڤه‌رێن سنووری ل پارێزگه‌ها دهۆكێ و ده‌ڤه‌رێن سنوری یێن دی د ناڤبه‌را هه‌رێمێ و توركیا، رادیوا (ده‌نگێ ئه‌مریكا) دیداره‌ك ل گه‌ل رێڤینگ هروری، سه‌رۆكێ لژنا پێشمه‌رگه‌ ل په‌رله‌مانێ كوردستانێ ئه‌نجامدا.

ل دۆر وێ چه‌ندێ ئایا په‌رله‌مانێ كوردستانێ ل سه‌ر وان شه‌ر و پێكدادانان و ده‌ربازكرنا سنوری دێ روونشتنه‌ك هه‌بیت، رێڤینگ هروری، سه‌رۆكێ لژنا پێشمه‌رگه‌ی ل په‌رله‌مانێ كوردستانێ، گۆت” به‌ری نوكه‌ روونشتنێن په‌رله‌مانی هاتینه‌ كرن و ل سالا بۆری ده‌مێ له‌شكركێشیا توركی، كو چه‌ند ده‌ڤه‌ر كونترۆلكرین، چه‌ند لژنێن په‌رله‌مانی بۆ سه‌رانسه‌ری سنوری پێكهاتن و بۆچوونێن خوه‌ مه‌ ئاراسته‌ی په‌رله‌مانی و حوكمه‌تێ كرن كو هنده‌ك ژ وان بۆچوونان گرێدای حوكمه‌تا هه‌رێمێ بوون ژوان گرێدای په‌یوه‌ندیێن حوكمه‌تا هه‌رێمێ و به‌غدا، به‌لێ مخابن هه‌تا نوكه‌ چ گاڤه‌كا به‌رچاڤ نه‌بوو، چونكی ب سه‌دان گوند ژئه‌گه‌رێ وان شه‌ر و پێكدادانان هاتینه‌ چۆلكرن.

رێڤینگی گۆت ژی” دڤێت دانوستاندن د ناڤبه‌را حوكمه‌تا هه‌رێمێ و به‌غدا و حوكمه‌تا توركیا و په‌كه‌كێ هه‌بیت، چونكی توركیا هێزێن خوه‌ دئینیت و ئه‌ڤه‌ جهێ مه‌ترسیێ یه‌، هنده‌ك گاڤێن دی یێن ڤه‌شارتی ل پشت وێ له‌شكركێشیا توركی ل هه‌رێما كوردستانێ یێن هه‌ین و توركیا زێده‌تر دخوازیت هنده‌ك باره‌گایێن په‌كه‌كێ ژناڤ ببه‌ت”.

رێڤینكی ئاشكراكر ژی كو دبیت توركیا 11 كیلۆمه‌تران هاتبیته‌ دناڤ ئاخا هه‌رێمێ دا و یێن نێزیكی وان گوندان بووین و خه‌لكێ گوندان ب چاڤێن خوه‌ سه‌ربازێن تورك دبینن و ئه‌و جهێن كونترۆلكرین ژی گه‌له‌ك د ستراتیژی نه‌ تاكو چیایێ مه‌تینا كو ژ نوكه‌ و وێڤه‌ دێ كه‌ڤنه‌ ژێر رادار و دووربین و توبخانێن وان.

گۆت ژی” مخابن حوكمه‌تا عیراقێ وه‌كو حوكمه‌ته‌كا خودان سه‌روه‌ری نه‌مایه‌ و حوكمه‌تا عیراقێ سه‌روه‌ریا خوه‌ ل گه‌ل هه‌رێما كوردستانێ د ده‌روازێن سنوری و داهاتێ وێ دا دبینیت و ب هیچ شێوه‌كی پاراستنا سنوران كو پشكه‌كه‌ ژ عیراقێ و كارێ وێ یه‌ ب به‌رپرسیاره‌تیا خوه‌ نه‌زانی یه‌”.

د به‌رسڤا پرسیاره‌كێ دا ل دۆر ئایا بنگه‌هێن هێزێن عیراقی ل وان سنوران هاتینه‌ دانان، گۆت” هنده‌ك یێن هه‌ین، به‌لێ گه‌له‌ك دكێمن، مه‌ هه‌موویان ل جارا بۆری هاوار دكر كو توركیا دێ ده‌ست ب سه‌ر زنارا كێسته‌ و پشتا گوندێن هرورێ و دێشیشێ و هه‌تا خامتیری گریت، ئه‌گه‌ر 50 سه‌ربازێن عیراقی یان زێره‌ڤانێن سنوری ل وان ده‌ڤه‌ران هه‌بان، هیچ بیانویه‌ك بۆ توركیا نه‌دما كو بهێته‌ وان ده‌ڤه‌ران، به‌لێ مخابن خه‌مساری هاته‌ كرن”.

سه‌باره‌ت وێ چه‌ندێ كا بزاڤه‌ك ب رێیا جڤاتا نوونه‌رێن عیراقێ بۆ راوه‌ستاندنا وی شه‌ری هاتیه‌ كرن، سه‌رۆكێ لژنا پێشمه‌رگه‌ی ل په‌رله‌مانێ كوردستانێ گۆت” به‌لێ، ل جارا بۆری ژی مه‌ یاداشته‌ك راده‌ستی سه‌رۆكایه‌تیا په‌رله‌مانێ كوردستانێ كر و مه‌ پێشنیازێن خوه‌ ژی به‌رچاڤكرن و بۆ جهێن په‌یوه‌ندیدار و جڤاتا نوونه‌رێن عیراقێ ژی هاته‌ هنارتن، به‌لێ كه‌س ل دووڤ بانگه‌وازیا مه‌ نه‌هاتیه‌”.

ژلایێ خوه‌ ڤه‌، عه‌مید (دلێر فه‌رزنده‌) فه‌رماندێ هێزێن سنوری ل ده‌ڤه‌رێ كو سه‌ر ب حوكمه‌تا عیراقێ ڤه‌نه‌، د داخۆیانیه‌كا رۆژنامه‌ڤانی دا گۆت” پشتی ل چه‌ند رۆژێن بۆری توركیا ئۆپه‌راسیۆنه‌ك دژی په‌كه‌كێ ل سه‌ر سنورێ ده‌ڤه‌را به‌رواری بالا ئه‌نجامدای، ئه‌و جهێن مه‌به‌ستا وێ بوو داگیركرن، نوكه‌ شه‌ر به‌ر ب دووماهیێ دچیت وتنمێ هنده‌ك جاران توپبارانكرن یا هه‌ی”.

گۆت ژی” ل دۆر وان روودانان ل سه‌ر مه‌ ئه‌وه‌، حوكمه‌تا عیراقێ ل هه‌موو هوورده‌كاریان ئاگه‌هدار بكه‌ین، یا دی ل سه‌ر وێ دمینیت كا دێ چ هه‌لویست هه‌بیت، به‌لێ هه‌تا نوكه‌ حوكمه‌تا عیراقێ یا بێ ده‌نگه‌”.

ناڤبری خویاكر ژی كو هه‌رچه‌نده‌ شه‌ری گه‌له‌ك گوندێن وێ ده‌ڤه‌رێ ڤه‌گرتیه‌، به‌لێ كه‌س ئاواره‌ نه‌بوویه‌ و زیان ژی ب خه‌لكێ وان گوندان نه‌كه‌فتینه‌، به‌لێ یێن تووشی تورسێ بووین.

Back to top button