زانیاری نوێ لەبارەی گەڕانەوەی پارتی بۆ کەرکووک

((خۆر))-جوتیار شەریف

بەرپرسێکى پارتى دیموکراتى کوردستان ڕایگەیاند، ئەوەى حکومەتى بەعس نەیتوانى لە کەرکووک بیکات ڕاکان جبورى کردى و پێشى وایە، پێشمەرگە و ئاسایش نەگەڕێنەوە کەرکوک ئەو شارە ئارام نابێت.

ديارى حسێن، جێگرى ئەنجومەنى سەرکردایەتى کەرکووک – گەرمیانى پارتى دیموکراتی کوردستان لە گفتوگۆیەکى تەلەفزیۆنیدا ئاماژەى بەوە کرد، تائێستا بارەگاکانى پارتى لە کەرکووک چۆڵ نەکراون و چاوەڕێ دەکەین چۆڵ بکرێن بۆ ئەوەى وەریانبگرینەوە.

باسى لەوەشکرد، گفتوگۆکان لەگەڵ بەغدا بۆ گەڕانەوە بۆ کەرکووک بەردەوامن و بڕیارى حکومەت هەیە بۆ ئەوەى بارەگاکانمان چۆڵ بکرێن و چاوەڕێ دەکەین لە ئایندەیەکى نزیکدا ئەو گفتوگۆیانەش بە ئەنجام بگەن و بگەڕێینەوە کەرکووک.

سەبارەت بە مەرجەکانى پارتى بۆ گەڕانەوە ڕونیکردەوە “تەنها ئەوە نییە بارەگاکانمان چۆڵ بکرێن، ئێمە بۆیە کەرکوکمان چۆڵ کرد لەبەر ئەوەى لە16ى ئۆکتۆبەرەوە داگیرکراوە، داگیرکردنى هەروا بە سادە و ساکارى تێناپەڕێت و دەبێت ئەوانەى خەڵکى ئەوێ نین و لەوێ نەبوون بکشێنەوە، ناکرێت بچینە کەرکووک و لەبارەگاى خۆمان سەرکز بکەین و هیچمان پێنەکرێت”.

پێشى وایە، بارودۆخى کەرکووک وەک پێش ڕوداوەکانى 16ى ئۆکتۆبەر نییە و حزبەکان خۆیان دەڵێن، ئێستە شتێکى تر هەیە لە کەرکووک و خەڵکى کەرکووک بە گەڕانەوەى پارتى وا هەست دەکەن کورد لە کەرکووک هەیە و ناڵێن ئەوە کەى پارتى دەگەڕێتەوە و دەڵێن ئەوە کەى کورد دەگەڕێتەوە.

دیارى حسێن جەختیلەوەشکردەوە، ئەگەر مادەى 140 جێبەجێ بکرێت کێشەکان چارەسەر دەبن و ئەوەى حکومەتى بەعس نەیتوانى لە کەرکووک بیکات ڕاکان جبورى پارێزگارى بە وەکالەت کردى، ئەگەر ئاسایش و پێشمەرگە نەگەڕێنەوە هەرگیز کەرکوک ئارام نابێت و کاتێک پارتى گەڕایەوە بۆ کەرکووک داگیرکارى نامێنێت.

Back to top button