شاخەوان عەبدوڵڵا: بەڵگەمان لەبەردەستە کە چەکداری لایەنێکی سیاسی دیاریکراو هەوڵی تێکدانی ئاهەنگەکانی پارتیان داوە

شاخەوان عەبدوڵڵا: بەڵگەمان لەبەردەستە کە چەکداری لایەنێکی سیاسی دیاریکراو هەوڵی تێکدانی ئاهەنگەکانی پارتیان داوە

شاخەوان عەبدوڵڵا ئەندام پەرلەمانی پارتی دیموکراتی کوردستان لە کەرکوك رایگەیاند “بە خۆشحاڵییەوە ئەو گەنجانەی ئەمڕۆ ئازاد دەکرێن، بە هۆی هەوڵەکانی سەرکردایەتیی پارتیەوەیە”.

 

شاخەوان عەبدوڵڵا، بەربژێری دەرچووی پارتی دیموکراتی کوردستان لە کەرکوك کۆنگرەیەکی رۆژنامەوانیدا رایگەیاند، “لە رۆژی دووەم لەکاتی ئاهەنگگێڕانی لایەنگرانی پارتی دیموکراتی کوردستاندا بەهۆی سەرکەوتنی پارتیەوە، هەندێك کەسی گێرەشێوێن لەلایەن چەند لایەنێکی سیاسییەوە خزێنرانە ناو لایەنگرانی پارتی دیموکراتی کوردستانەوە. کە بە داخەوە سەر بەو لایەنە سیاسییە بوون کە تەحەمولی شکستیان نەکرد”.

 

لە کۆنگرەکەدا، شاخەوان عەبدوڵڵا سیدییەکی تایبەتی بەرز کردەوەو گووتی “بە بەڵگە لە لامانە کە چەکدارو هەندێك کادیری سیاسی ئەو لایەنەن و هەندێکیشیان ئەندامن لە دەزگای ئەمنی ئەو لایەنە سیاسییە.. ئەو لایەنە سیاسییە چەکی بەکار‌هێناوە بۆ ئەوەی دژی خەڵکی مەدەنی بەکاریبهێنێت و تەنانەت لە دژی دەزگا ئەمنییەکانیش بۆ ئەوەی ئاهەنگگێڕانی پارتی پێ تاوانبار بکرێت بەوەی کە ئەمانە هەوڵی پشێوی دەدەن”.

 

 

 

لە بەشێکی دیکەی قسەکانیدا شاخەوان عەبدوڵڵا ئاماژەی بەوەدا، “ئێمە وەکو پارتی دیموکراتی کوردستان سەرکەوتوو بووین لە کەرکوك. سەرکەوتنیشمان هاوتەریبە لەگەڵ ئەوەی کە چۆن بتوانین قۆناغێکی نوێ لەم شارە بهێنینە کایەوە کە ئەویش پێکهاتنی تەواوی پێکهاتەکانە لەسەر کۆی مەلەفەکانی کەرکوك کە ئەویش سیاسی، ئیداری و ئەمنین”.

 

رووداوەکانی چەند رۆژی رابردوو لە کەرکوك لە شەوی دووشەممە 11-10-2021 سەریهەڵدا کە لیوای 61 چوونە گەڕەکی رەحیماوا و 10 کەسیان دەستگیر کرد و دواتر بە کەفالەت ئازاد کران، بەڵام لە بەیانی رۆژی سێشەممە 12-10-2021 لە فولکەی ئیخوان بڵاوەیان بە هێز کرد و شەقامە سەرەکییەکەیان داخست. هەروەها دواتریش لە ئێوارەی هەمان رۆژ چەند بازگەیەکیان دانا و 71 گەنجیان دەستگیر کرد و مۆبایلیان لە بەشێکی خەڵکیش وەرگرتووە.

Back to top button