فەرماندەیەکی پێشمەرگە: حەسەن کوێستان لە شەڕی داستانی کۆڕێ هەڵات

 

 

فەرماندەیەكی داستانی كۆڕێ لە ڕیزی پارتی دیموكراتی كوردستان، ئەو بانگەشانەی لە میدیاكانی یەكێتیی نیشتمانیی كوردستانەوە بڵاو دەكرێتەوە لەبارەی داستانەكە، بە درۆیەكی شاخدار وەسف دەكات و چەند نهێنییەك لەبارەی هەڵهاتن و خۆبەپاشدانی فەرماندەكانی یەكێتی لە شەڕەكە دەدركێنێت.

چەند ڕۆژێكە، میدیای فەرمیی یەكێتی بۆ قەرەبووكردنەوەی ئەو ئابڕووچوونەی لە ئەنجامی خیانەتی ١٦ی ئۆكتۆبەر و هەڵاتنی هێزەكانی یەكێتی بەرامبەر بە حەشدی شەعبی و حەسەن پلایس و وەرگەڕاندنی دەبابەكانیان لە كاتی هەڵاتنیان لە كەركووك ڕووبەڕوویان بۆتەوە، بەدوای هەر وشەیەكدا دەگەڕێت لەسەر داستانی كۆڕێ كە وەسفێكی ئەرێنیی یەكێتی تێدا كرابێت. لەم چوارچێوەیەشدا چەندان زانیاریی نهێنی و درۆیان بڵاو كردۆتەوە.

لەمبارەوە عومه‌ر عوسمان فەرماندەی هێزی پێشمەرگەی کوردستان بە میدیاکانی ڕاگەیاند ،”ئەو قسانەی یەكێتی لە زاری عەبدوڵا چۆمانی، یان كەسێكی بەساڵاچووی وەك كەریم ئەحمەد، یان پەتپەتێنكەرێكی وەك قادر عەزیزەوە بڵاویان دەكاتەوە، هیچ بنەمایەكیان نییە و درۆی شاخدارن، ئەوانە كادیری یەكێتین و ناچارن ئەگەر درۆش بێت، بە دڵی بەرپرسەكانیان بیكەن“.

روونیشی كردەوەتەوە، داستانی كۆڕێ بە دوو قۆناغ تۆمار كرا، یەكەمیان لە ٧ی نیسانی ١٩٩١ بوو، پاش نیوەڕۆیەكیان لە مەسیف سەڵاحەدین بووین، ”كۆسرەت ڕەسووڵ لەگەڵ پاسەوانێكی بوو بەرامبەر بە (هۆتێل رۆژ)، لەو كاتە دەبابەكانی بەعس گەیشتنە مەسیف، بینیم كۆسرەت رەسووڵ دیار نەما و دواتر لەگەڵ حەسەن كوێستانی ڕۆشتن و هیچ هێزێكیان نەمانەوە، ئێوارەی هەمان ڕۆژ لە حوجرانەوە هێزەكانی بارزان خالی دۆڵەمەری و بەشێك لە هێزەكانی لقی دووی پارتی گەیشتن“.

ئاماژەشی بەوە كرد: ”له‌ناکاو گوتیان سه‌ربازی عێراق له‌ مه‌سیف هاته‌ خواره‌وهو به‌په‌له‌ خۆمان گه‌یانده‌ ده‌ربه‌ندو گرووپێک سه‌رکه‌وتنه‌ لوتکەی لای مه‌سیف و که‌مینێکمان دانا و شەڕێکی قورس ڕووی دا، ٤ دەبابەی عێراق بەجێما و كوژراو و گیراویشیان هەبوو، دواتر که‌ شکانو کاک کۆسره‌ت و حه‌سه‌ن کوێستانی و کانه‌بی شیوعی لەگەڵ دوو سێ که‌سی دیکه‌ لە لای تەوسكەوە هاتن، له‌ دوورەوە‌ کۆسره‌ت ره‌سووڵ گوتی (بارزانییه‌کان سەلماندتان که‌ کوڕی رۆژی ته‌نگانه‌ن)“.

ئەو فەرماندەیەی پێشمەرگە ئەوەشی ئاشكرا كرد: ”خالید دۆڵه‌مه‌ری لەو كاتەدا به‌ حه‌سه‌ن کوێستانی گوت، (ها قاره‌مان بۆ كوێ هه‌ڵهاتی؟) بەڵام من گوتم کاتی ئه‌وه‌ نییه‌ عه‌یبه‌ لێی گەڕێ، من نازانم به‌ده‌م مێژووه‌وه‌ درۆ بکه‌م، دواتر لەگەڵ كۆسرەت ڕەسووڵ رێككەوتین كە بەرەیەك دابنێین، گوتم له‌ لای رۆژهەڵات کاتی خۆی دابه‌شمان کردبوو سه‌ری ره‌شمان دابوه‌ ئه‌وان گوتمان ئێوه‌ وه‌رنه‌ ئه‌م به‌ر سنۆبه‌ره‌کانی شێرەسوار كە دەكەوێتە رۆژهه‌ڵاتی ده‌ربه‌ند، لایه‌کەی دیکه‌ش بۆ به‌ره‌ی کوردستانی كە شیوعی و حزبه‌کانی دیکه‌ بوون، ئیتر هێزەكان بەم شێوەیە جێگیر بوون و بەرگرییان كرد، جگە لە هێزەكانی پارتی و یەكێتی، هێزی بەرەی كوردستانی و شیوعی و كەسانێكیش هاتنە ریزمان كە پێشمەرگە نەبوون، دوای چوار ڕۆژ و لە ١١ی مانگ، رژێمی بەعس پێشڕەوی کرد، ئه‌و کاته‌ هه‌موومان به‌یه‌ک به‌ره‌ شەڕمان کرد، هێرش بۆ لای یه‌کێتی نه‌بوو، بەڵكوو بۆ لای رۆژئاوا بوو، بۆیە لە بەرەی رۆژئاواوە كە هێزەكانی ئێمەی لێ بوو، هێرشەكە تێكشكێندرا“.

ئەو فەرماندەی داستانی كۆڕێ باسی لەوەش كرد كە لە داستانەكەدا چەندان پێشمەركە شەهید بوون كە بەشێكیان لە هێزی بارزان بوونو هاووڵاتیی سڤیلیش شەهید بوون، ”خەڵكی دیكەش كە دەڵێن ١٠ شەهیدمان داوە، درۆ دەكەن“.

عومەر عوسمان نەیشاردەوە كە لە شەڕی دووەمی كۆڕێ و پێش ئەوەی بە یەكجارەكی شەڕ كۆتایی بێت، ”بەرپرسانی یەكێتی كە لەوێ بوون، حەزیان ده‌کرد شەڕەكە ته‌واو ببێت هەتا زووتر بچنه‌ به‌غدا بۆ دانوستان، بۆیە پێویست ناكات راستییەكان بشێوێندرێت، ئەو شوێنەی داستانی كۆڕێی تێدا تۆمار كرا، رۆژئاوای شارەكە بوو كە هیچ هێزێكی یەكێتی لێ نەبوو، بەڵكوو هێزەكانی پارتی هێرشەكەیان تێكشكاند“.

 

 

 

 

Back to top button