لاهوور جەنگی هێزی چەكدار دەنێرێتە سەر كۆمەڵەی شۆڕشگێڕی زەحمەتكێشانی كوردستانی ئێران و روونكردنەوەیەكی درۆیان پێ بڵاو دەكاتەوە

لاهوور جەنگی، سەردەستەی تاقمی خۆفرۆشی ١٦ی ئۆكتۆبەر، هێزێكی چەكدار دەنێرێتە سەر بارەگای كۆمەڵەی شۆڕشگێڕی زەحمەتكێشانی كوردستانی ئێران و هەڕەشەی ئەوەیان لێ دەكات ئەگەر ڕوونكردنەوەیەك بڵاو نەكەنەوە، ئەوا سەرجەمیان رادەستی ئێران دەكاتەوە.

ئەمڕۆ شەممە ١٧ی نیسانی ٢٠٢١ ئاشكرا كرا، چەند ڕۆژێكە پێشمەرگەیەكی كۆمەڵەی شۆڕشگێڕی زەحمەتكێشانی كوردستانی ئێران بە ناوی (سمكۆ بەنفشی) لە شاری سلێمانی بێ سەروشوێنە. بەم هۆیەشەوە كاردانەوەیەكی توند دروست بوو و راستەوخۆ مەترسیی ئەوە راگەیاندرا كە یەكێتی ئەو پێشمەرگەیەش رادەستی ئێران بكاتەوە.

لەمبارەیەوە ئەرسەلان یارئەحمەدی، سەرۆكی رێكخراوی مافی مرۆڤی هەنگاو لە پێگەی خۆی لە (فەیسبووك) گازاندەی لەم هەڵوێستەی كۆمەڵە كرد و رای گەیاند: “لە راگەیاندراوەكەی كۆمەڵەدا هیچ ئاماژە نەدراوە کە تۆمەتی سیخوڕی بۆ چ لایەنێک خراوەتە پاڵ سمكۆ بەنفشی؟”.

بەپێی زانیارییەكان، هەر ئەمڕۆ هێزێكی ئەمنیی سەر بە لاهوور جەنگی، چوونەتە سەر بارەگای كۆمەڵە و هێندە فشاریان لێكردوون كە لە جێگەی سەركۆنەكردنی رەفتاری هێزە ئەمنییەكانی سلێمانی، ناچاریان كردوون سوپاسیشیان بكەن، لە كاتێكدا هێزەكانی سەر بە لاهوور جەنگی پێشمەرگەیەكی كۆمەڵەیان بۆ ماوەی چەند ڕۆژێك شوێن بزر كردووە و دواتر تۆمەتی سیخوڕییان داوەتە پاڵ. 

پێشتر سروە ناسری، ئەندامی کۆمیتەی ناوەندیی کۆمەڵە / ڕێکخراوی کوردستانیی حزبی کۆمۆنیستی ئێران ئاشكرای كردبوو، ئەو پێشمەرگەیە بە فەرمانی لاهوور جەنگی دەستگیر كراوە.  

ساڵی رابردوو لە مانگی نیساندا، مستەفا سەلیمی، بەندكراوی كورد پاش هەڵاتنی لە بەندیخانە و پەنابردنی بۆ سلێمانی، لە لایەن تاقمێكی سەر بە لاهوور جەنگییەوە دەستگیر كرا و ڕادەستی ئێران كرایەوە و لەسێدارە درا.

هەر لە ساڵی رابردوودا و لە مانگی ٧ی ٢٠٢٠، عەلی قایار، هاوسەرۆكی هەدەپە لە شاری سێرتی باكووری كوردستان كە بۆ كاری بازرگانی لە شاری سلێمانی بوو، بێ سەروشوێنە و تا ئێستاش دەزگا ئەمنییەكانی سلێمانی هیچ ڕوونكردنەوەیەكیان لەبارەی كەیسەكەیەوە بڵاو نەكردۆتەوە.

Back to top button