لاهوور جەنگی هێزێكی حزبی دیموكراتی دەستگیر كردووە و لە بەرامبەر رازیكردنی ئێران مەترسی هەیە تەسلیمیان بكاتەوە

 

بەپێی زانیارییەكان، ماوەی دوو رۆژە لاهوور جەنگی، سەردەستەی تاقمی خۆفرۆشی ١٦ی ئۆكتۆبەری نێو یەكێتی، ژمارەیەك پێشمەرگەی حزبی دیموكراتی كوردستانی ئێرانی دەستگیر كردووە كە بە نیازبوون بۆ ئەنجامدانی چالاكی بچنە نێوخۆی رۆژهەڵاتی كوردستان و ئێران. 

عەلی جەوانمەردی، رۆژنامەنووسی كورد لە ئەمریكا ئەم زانیارییەی پشتڕاست كردەوە و ئاشكرای كرد كە ئەو كارە بۆ ئەوەیە لاهوور جەنگی بیسەلمێنێت لە ئۆپەراسیۆنی كوشتنی قاسم سولەیمانیدا دژە تیرۆر بەشداری نەكردووە و مەترسیی زۆر هەیە ئەو پێشمەرگانە رادەستی ئێران بكاتەوە.

ئەمە یەكەمینجار نییە لاهوور جەنگی شۆڕشگێڕانی كورد رادەست بكاتەوە، لە نیسانی ٢٠٢٠یشدا مستەفا سەلیمی كە پەنای بۆ پارێزگای سلێمانی هێنابوو، لەلایەن تاقمەكەی لاهوور جەنگییەوە دەستگیر كرا و دژە تیرۆری یەكێتی رادەستی ئێرانی كردەوە. 

لەم رۆژانەشدا جگە لەو هێزەی دیموكرات كە مەترسی هەیە رادەستی ئێران بكرێنەوە، سمكۆ بەنەفشی، پێشمەرگەی كۆمەڵەی شۆڕشگێرانی كوردستانی ئێران لە لایەن دژە تیرۆری یەكێتییەوە ڕفێندراوە و گومان دەكرێت بە نیازبن رادەستی ئێرانی بكەنەوە.

Back to top button