لە عەفرین نووسینگەی دەزگای خێرخوازیی بارزانی دەكرێتەوە

بەرەبەیانی رۆژی دووشەممە 6ی 2ی 2023، بوومەلەرزەیەکی بەهێز کە بە گوڕی 7.8 بە پێوەری ڕێختەر پێوانە كرا، لە چەند شار و شارۆچکەیەکی سنووری هەردوو دەوڵەتی (توركیا و سووریا) لە باکوور و رۆژئاوای کوردستانی دا و بە هەزاران تەلار باڵەخانە و یەکەی نیشتەجێبوونی هاووڵاتییانی وێران کرد و بە دەیان هەزار كەس گیانیان لەدەست دا و دەیان هەزاری دیكە بریندار بوون.

بەپێی زانیارییە فەرمییەکان، کە تاوەکوو ئێستا بڵاو کراونەتەوە و بەردەوام ژمارەکەش زیاتر دەبێت، زیاتر لە 33 هەزار کەس بەهۆی ئەو بوومەلەرزەیە لە تورکیا و سووریا گیانیان لەدەست داوە و نزیکەی 100 هەزاریش بریندار بوون و بە ملیۆنانی دیکەش ئاوارە بوون و ماڵ و حاڵیان لێ تێکچووە.

هەر لەدوای بوومەلەرزەکە، هەڵمەتی فریاكەوتن و بەهاناوەچوونی دەزگای خێرخوازیی بارزانی بۆ لێقەوماوانی بوومەلەرزە لە باكوور و رۆژئاوای كوردستان و توركیا و سووریا دەستی پێ کردووە و رۆژ بە رۆژیش بەرفراوانتر دەبن، لەگەڵ گەیشتنی هاوکارییەکانیش بە عەفرینی رۆژئاوای کوردستان، دەزگای خێرخوازیی بارزانی نووسینگەی تایبەتی خۆی لە عەفرین کردووەتەوە.

لەمبارەیەوە، مووسا ئەحمەد، سەرۆكی دەزگای خێرخوازیی بارزانی لە پرێس كۆنفرانسێكدا کە لە ماڵپەڕی فەرمیی دەزگاکەی بڵاو کراوەتەوە، تیایدا رایگەیاندووە، نووسینگەی تایبەتی خۆیان لە عەفرین کردووەتەوە، گوتیشی: ”لە یەكەم رۆژی روودانی ئەو كارەساتەوە، لەلایەن نووسینگەی جەنابی سەرۆك بارزانی ئاگادار كراینەوە و داوایان كرد، ئەوەی لە تواناتاندا هەیە، خزمەتی لێقەوماوان و قوربانییانی كارەساتی بوومەلەرزە لە توركیا و سوووریا بكەن، گوتیان بە بێ جیاكاری خزمەتی هەموو لێقەوماوان و قوربانییانی كارەساتەكە بكەن.“

سەرۆكی دەزگای خێرخوازیی بارزانی ئاماژەی بەوەش دا كە هەر لە سەرەتاوە مەسرور بارزانی، سەرۆكی حكوومەتی هەرێمی كوردستان، كە هاوكات سەرۆكی بۆردی دامەزرێنەرانی دەزگای خێرخوازیی بارزانییە، ئێمە و چەندین وەزارەت و ناوەندی حكوومییشی راسپاردووە كە بەخێرایی هەڵمەتی فریاكەوتن و رزگاركردن و بەهاناوەچوون ئەنجام بدەین.

سەرۆكی دەزگای خێرخوازیی بارزانی دەشڵێت: ”تیمەكانی ئێمەش لەگەڵ ئەوەی لە دۆخێكی سەختدان، بەڵام هەست بە ماندووبوون ناكەن، شەو و رۆژیان بەسەر یەك خستووە، بۆ ئەوەی خزمەتی برا و خوشكانی لێقەماوی ئەو كارەساتە گەورەیە بكەن.“

سەرۆكی دەزگای خێرخوازیی بارزانی سەبارەت بە جۆر و چەندایەتیی هاوكارییەكان گوتی: ”لە كاروانی یەكەمی هاوكارییەكەماندا 250 تەن خۆراك و كەلوپەل و دەرمان و پێداویستیی پزیشكیمان هێناوە و كاروانی دووەمیش لە رێگەدایە. هەروەها بە هاوكاریی كاڤین گرووپ، كۆمەڵێك ئامێر هاتوون كە كاری رزگاركردن دەكەن، لەبەرئەوەی زۆر بەداخەوە، هێشتا ژمارەیەكی زۆری خەڵك لەژێر بینا رووخاوەكاندا ماون.“

ئاماژەی بەوەش دا کە خەڵكێكی زۆر لە رۆژئاوا و لە باكووری كوردستانیش پێویستیان بە خێوەت و بەتانی هەیە، ئەوەشمان تا راددەیەك دابین كردوون.

سەرۆكی دەزگای خێرخوازیی بارزانی ئەوەشی ئاشكرا كرد، لەگەڵ بەرپرسان و بڕیاربەدەستانی عەفرین گفتوگۆیان كردووە و رەزامەندییان دەربڕیوە، لە عەفرین نووسینگەی دەزگای خێرخوازیی بارزانی بكرێتەوە.
هەر لەوبارەیەوە گوتی: ”زۆر سوپاسی ئەو هاوكاری و ئاسانكارییە دەكەین، چونكە ئەوە بەڕاستی كارئاسانییەكی زۆر بۆ گەیاندنی خزمەتگوزارییەكانمان بە خەڵكی لێقەوماو دەكات.“

سەرۆكی دەزگای خێرخوازیی بارزانی جەختی لەوە كردەوە، رۆژانە هەڵمەتەكانی فریاكەوتن و بەهاناوەچوونی دەزگای خێرخوازیی بارزانی بۆ لێقەوماوانی بوومەلەرزە لە باكوور و رۆژئاوای كوردستان و توركیا و سووریا بەرفراوانتر دەبن. گوتی: ”پێداویستیی خەڵكی زیانبەركەوتوو گەلێك زۆرە، لەوانە، شیری منداڵ و خێوەت و سەرجەم كەلوپەلی پێویستیی ناوماڵ و هەروەها بەهۆی وەرزی زستان و سەرماوە، ئامێری گەرمكەرەوەیان پێویستە، بۆیە داوا لە رێكخراوە نێودەوڵەتییەكان و خەڵكی كوردستان دەكەین، هاوكاریمان بكەن و پشتیوانی ئێمە بن، بۆ ئەوەی كاری بەپەلەتر ئەنجام بدەین و زیاتر خزمەتی ئەو خەڵكە بكەین.“

بەپێی راپۆرتی پێنجەمی دەزگای خێرخوازیی بارزانی کە کۆپییەکی تایبەت بۆ (باسنیوز) ڕەوانە کراوە، یەکەم کاروانی هاوکارییەکانی ئەو دەزگایە گەیشتوونەتە عەفرین و 13 بارهەڵگرن، بەهۆیەوە زیاتر لە سێ هەزار خێزان لە هاوکاریەکانیان سوودمەند بوون، کە پێکهاتووە لە خواردنی وشکە، ئاوی خواردنەوە، جلوبەرگ، بەتانی و دەرمان.

Back to top button