هەرێمی كوردستان.. ناپاڵمێكی سوتێنەر تەقێنرایەوە

لەسنوری باڵەكایەتی بۆمبێكی فرۆكەی سەردەمی شەڕی هەشت ساڵەی نێوان ئێران- عیراق لەناوبرا.
لە راگەیەنراوێكدا بەڕێوەبەرایەتی گشتی كاروباری مین بڵاویكردۆتەوە، دوای ئاگاداركردنەوەمان سەبارەت بە دەركەوتنی بۆمبێكی فرۆكە لەناو باخچەی هاوڵاتیەك لەكاتی هەڵكەندنی زەوی لە ناحیەی حاجی ئۆمەران، بەڕێوەبەرایەتی چالاكیەكان بۆ چارەسەركردنی بۆمبەكە گەیشتە شوێنەكە دەركەوت كە بۆمبەكە لە جۆری ناپاڵمی سوتێنەرەو زۆر مەترسیدارە.
ئاماژەشیكردوە، دوای هەڵسەنگاندن و گرتنەبەری رێكاری سەلامەتی، بڕیاردرا بۆمبەكە بگوازرێتەوە چاڵی تەقاندنەوە لە چیای بەردەبوك سەر بە ناحیەی گەڵاڵەو دەستبەجێ بۆمبەكە لە پرۆسەیەكی سەركەوتودا لەناوبرا.
بەڕێوەبەرایەتی گشتی كاروباری مین ئاماژەشیكردوە، چەندینجارە ئەم جۆرە بۆمبانە لەجۆری جیاوازو قەبارەی جیاواز دەدۆزرێنەوە، هەر لە هەمانكات 5 تەقەمەنی جەنگی تر لەهەمان شوێن دۆزرانەوە.

Back to top button