هەرێمی کوردستان لەبەردەم شەڕی داعش و حەشد و پەکەکەدا!

((خۆر))- هۆشیار عەلی

هەرێمی کوردستان ئەو قەوارە دەستووری و یاساییە کە لە چوارچێوەی دەوڵەتی عێراقدا بە شێوەی فیدڕاڵی پارێزگاری لە خۆی و پێکهاتەکانی ناوی بە کورد و تورکمان و مەسیحی و کاکەیی و ئێزیدی و ئەوانی دیکە دەکات، دوژمنانی گەلی کوردستان هەر جارەی بە ناوێک و لە پەنای هێزێکەوە دەیانەوێ ئەو قەوارە دەستووریە نەهێڵن یان بەلایەنی کەم لاوازی بکەن، سەرەڕای ئەو پەلامارانەی کە دەکرێتە سەری پشتیوان بە خوا و هێزی پێشمەرگەی کوردستان و هۆشیاری سەرکردایەتی سیاسی کوردستان ئەو قەوارە هەروەکو ئاسنی لێهاتووە هەرچەند پیای بکێشی بەهێزتر دەبێت.
دەمێک نیە بەناوی داعشەوە هێرشکرایە سەر هەرێمی کوردستان و هەوڵدرا بە هەر نرخێک بێت کۆتایی بەو ئەزموونە سیاسیەی هەرێمی کوردستان بهێنرێ و ئاڵای رەشی داعش لە سەر قەڵای هەولێر هەڵبکرێت و دوژمنانی کورد و کوردستان بە خەونی لە مێژینەیان بگەن، بەڵام هێزی پێشمەرگەی کوردستان بە پشتیوانی و هەوڵی دیپلۆماسیانەی سەرکردایەتی سیاسی کوردستان توانی ئەفسانەی داعش بەتاڵبکاتەوە و ئەو پەلامارە دوژمنکارانەیە رابگرێت.
دوای شکستی ئەو هێرش و پەلامارانە بۆ جارێکی دیکە هەر داعش لە پەنای حەشدی شەعبیەوە هێرشی کردەوە سەر هەرێمی کوردستان و لە پردێ و سحێلا وا لووتی شکا کە جارێکی دیکە غیرەتی ئەوە نەکات خۆی بە هێزی پێشمەرگەی کوردستان تاقیبکاتەوە.
ئێستاش بۆ جارێکی دیکە دەستی دوژمنان پەکەکەیان وەکو کارتێکی ئیقلیمی بۆ دژایەتی هەرێمی کوردستان و هێنانی شەڕ بۆ ناو خاکی هەرێمی کوردستان بەکارهێنا، کە لە مێژە هەر لەدوای کۆنتڕۆڵکردنەوەی شنگال لە دەستی چەکدارەکانی داعش نەخشەیان بۆ ئەو پلانەیان داناوە و پەکەکە پلانی (c)، هێزە داگیرکەرەکانی کوردستانە، بە شێوەیەک داعش بە جۆرێک و حەشد بە شێوەیەکی دیکە و پەکەکەش بە جۆرێکی دیکە بەکاردەهێنن تا شەڕو ئاڵۆزی بهێننە هەرێمی کوردستان و لەو ڕێگەشەوە لە قەوارەی دەستووری و یاسایی هەرێمی کوردستان بدەن، ئەوەش لە ترسی ئەوەی نەوەکو لە داهاتوو هەرێمی کوردستان دەوڵەتێکی بەهێزی ناوچەکە بێت.

Back to top button