پارتی: هێشتا زووە بۆ دروستکردنی هاوپەیمانی لە کەرکووک

جوتیار شەریف-خۆر

به‌رپرسی مه‌ڵبه‌ندی كه‌ركووكی یه‌كێتی ده‌ڵێت، دوور نییه‌ كورد و توركمان به‌یه‌كه‌وه‌ هاوپه‌یمانی ببه‌ستن. پارتیش له‌ كه‌ركووك رای ده‌گه‌یه‌نێت، جارێ زووه‌ بۆ بڕیاردان.

محه‌مه‌د عوسمان به‌رپرسی مه‌ڵبه‌ندی دووی یه‌كێتیی نیشتمانیی كوردستان له‌ كه‌ركووك، ڕای گه‌یاند، ئه‌گه‌ر هه‌ڵبژاردن له‌ عێراق بكرێت، دوور نییه‌ كورد و توركمان هاوپه‌یمانی ببه‌ستن.

ئه‌مڕۆ شه‌مە هه‌شتی ئاب، محه‌مه‌د خورشید به‌رپرسی لقی سێی پارتی دیموكراتی كوردستان له‌ كه‌ركووك ڕای گە‌یاند؛ جارێ زۆر زووه‌ باس له‌ هاوپه‌یمانی له‌ كه‌ركووك بكرێت، چونكه‌ دیار نییه‌ هه‌ڵبژاردن ده‌كرێت یان نا.

روونی كرده‌وه‌، هه‌ر هاوپه‌یمانییه‌ك له‌گه‌ڵ هه‌ر لایه‌نێك بێت، ئه‌گه‌ر له‌ به‌رژه‌وه‌ندی و خزمه‌تكردنی هاووڵاتییان بێت كارێكی باشه‌. ئه‌ویش ئه‌گه‌ر هاوشێوه‌ی لیستی برایه‌تی له‌ كه‌ركووك كاتی خۆی هه‌بوو، توركمان و مه‌سیحیشی تێدابوو.

به‌رپرسی لقی سێ ئه‌وه‌ی خسته‌ڕوو، هه‌ر حزبێكیش ئازاده‌ له‌گه‌ڵ كێ هاوپه‌یمانی ده‌كات، به‌ڵام ئێمه‌ وه‌ك پارتی بڕیارمان نه‌داوه‌ و له‌كاتی خۆیدا بڕیاری خۆمان ده‌ده‌ین.

Back to top button