پەرلەمانتارە خۆفرۆشەكانی بەغدا دەترسن لە دەستكەوتە كەسییەكان بێبەش ببن

(خۆر)- شاڵاو عەلی

ژمارەیەك لە پەرلەمانتارە خۆفرۆشەكانی بەغدا هاوپەیمانێتییەكیان بۆ درێژەدان بە خۆفرۆشییەكەیان بۆ هەڵبژاردنەكان پێكهێناوە.

بەپێی زانیارییەكان، ئەو پەرلەمانتار و مەندوبە نمایشکارانەی بەغدا، خەریکی پرۆژە و کاری خۆیانن بۆ کاتی هەڵبژاردن.

ئاسۆ عەبدوللەتیف، نووسەر پێیوایە كە ئەوەی ئەو پەرلەمانتارانە كاری بۆ دەكەن، یەك ئامانجی هەیە، ئەویش نەگەرانەوەیانە بۆ هەرێمی كوردستان، چونكە تووڕە و هیلاکی ئەوەن کۆتاییان بێت و بگەڕێنەوە هەرێمی كوردستان و نەتوانن درێژە بە کاری مەندوبسازی و عادەتی قەدیمی بدەن و لەو هەموو پەیوەندی و کەین و بەین و ئیمتیاز و دەستکەوتە شەخسیانەش بێبەش بن.

ڕۆژی دووشەممە ١١ی ١ی ٢٠٢١، پەرلەمانتارە خۆفرۆشەكان هاوپەیمانێتییەكیان بە ناوی (هاوپەیمانیی هیوای كوردستان) راگەیاند كە ڕاستەوخۆ لە لایەن زۆرێك لە بەكارهێنەرانی تۆڕە كۆمەڵایەتییەكەیەوە ناوەكەی بە (هاوپەیمانیی هیوای جاشەكان) ناوبرا.

چاودێریان پێیانوایە كە ئەو پەرلەمانتارانە بەم هەوڵەیان کاریان کرد گوتاری سیاسیی فەرمی کوردیی بە دڵی خۆیان شەق بكەن، ئەو تایپە حوکمڕانە مۆنۆپۆڵگەرەی شیعە، تا بمێننەوە، خۆیان گۆڕی بۆ لیستێکی پڕ لە دروشمی لووس و قەبە و پێچاوپێچ، بە ناوی هاوپەیمانیی هیوای کوردستان و بە گرانیش دەیفرۆشنەوە بە خەڵکی کوردستان بە ناوی چاکسازیی و گەڕاندنەوەی مووچەی فەرمانبەران، ئەمەش وەک ئاراستەیەکی سیاسیی و پەرلەمانیی بە تۆنێکی جیاواز لە گوتاریی حوکمڕانی کوردیی، بەڵام ئایا ئەم کردەیە مانای چییە جگە لە شکستی سیاسیی پرۆژەی ئایدۆلۆژیی حزبەکانیان؟ ئەگەر وا نییە چۆن دەبێت بە دوو ئاراستەی سیاسیی دژبەیەک کاربکەن بۆ داهاتوو، ئەی وەڵامی حزبەکانیان چی دەبێت لە داهاتوودا؟.

ئەمە لە كاتێكدایە هەر ئاراستەیەکی سیاسیی کوردیی، لە دەرەوەی كۆدەنگیی سیاسی و جڤاکی بۆ گفتوگۆ لەگەڵ دەوڵەتی ئۆتۆکرات و مەزهەبیی بەغدا، ریسک و سەرکێشییە بە قەوارەی هەرێمی كوردستان و دۆزەکەیەوە، بەڵام ئەو بەشە لە کورد و تەکەتولێکی حزبی کە وا بیر دەکاتەوە دەریچە بدۆزێتەوە بۆ لەحیمکردنی بەشێکی هەرێمی كوردستان بە بەغداوە، چەمکی دەوڵەت-نەتەوەی، قەبووڵ نییە و بە تۆپزی دژی ڕیفراندۆم وەستانەوە بە بیانووی گەڕاندنەوەی شکۆی خەڵک و فەزیلەتی تاک و خۆشگوزەرانی، کەچی لە بەغداد، ڕازین لەگەڵ تێرم و مێنتاڵێتی زاڵی شیعە کار بکەن، بەو هەموو فەساد و خوێنبەربوونەوە کە خاوەنی تێزی دەوڵەت-مەزهەبی نەتەوەیی و ویلایەتگەریی حەوزە و مەرجەعیەتیشن، کە تاک دەکاتە یەک جەستەی بێڕۆح و کۆیلەیەکی بێنرخی دەوڵەتفاشی. بینیمان لە ساڵانی رابردوو شیعە چ جۆرە فۆرمێکی دەوڵەتداریی مومارەسە کرد.

Back to top button