چاودێران : ئەوانەی لەبەغدا دژی مافەکانی خەڵکن بەشێکن لە کاری ئاژاوەگێڕی

گۆڤەند سەرکەش-خۆر

چاودێرانی سیاسی پێیان وایە ئەو گرووپە نەیارە پەرلەمانتارانەی کە لە بەغدان و دژی مافە ڕەواکانی گەلی کورد وەستاونەتەوە، هەر ئەوان دەستیان تێکەڵە لە دروستکردنی ئاژاوەگێڕی لە سلێمانی.

لە ماوەی ڕابردوودا هەریەك لە (سەركەوت شەمسەدین، غالب محەمەد، ڕێبوار كەریم، هۆشیار عەبدوڵا، یوسف محەمەد، ئەحمەدی حاجی ڕەشید و چەند پەرلەمانتارێكی دیكەی كورد) لە بەغداوە جگە لەوەی بە پێدانی زانیاریی ناڕاست و هاندانی عەرەبە شۆڤێنییەكان لە دژی هەرێمی كوردستان، بوونە هۆی بڕین و ڕاگرتنی مووچەی فەرمانبەرانی كوردستان لە چوارچێوەی یاسای پڕكردنەوەی كورتهێنانی دارایی عێراق بۆ ساڵی ٢٠٢٠، ئۆباڵەكەشیان خستە سەر هەرێمی كوردستان و هانی خەڵكییان دا بۆ كاری تێكدەرانە لە دژی دامەزراوەكانی هەرێمی كوردستان.

چاودێرانی سیاسیش پێیان وایە هەر هەمان گرووپ دەستیان تێکەڵکردوە لەگەڵ ڕێکخراوی تیرۆرستی پەکەکە و دەزگای سیخوڕی وڵاتێکی هەرێمی بۆ نانەوەی ئاژاوە و دروستکردنی شەڕ لەناو پارێزگای سلێمانی و لێکترازاندنی خەڵک و حزبەکانی ئەو شارە و ڕوخاندنی دەزگا حکوومیەکان و شێواندنی شیرازەی شارستانیەت لە سنوری ئەو پارێزگایە.
هەروەها عەتا سەراوی، ئەندامی سەركردایەتیی یەكێتی، لەو بارەوە ڕای گەیاند، تێكدەرەكان لە لایەن دەزگایەكی هەواڵگریی ئیقلیمی و پەكەكەوە پشتیوانی دەكرێن، دەستی پێكردووە، كەچی تائێستا هیچ یەكێك لەو پەرلەمانتارانە تەنانەت نەوێراون بۆ پارێزگای سلێمانیش بگەڕێنەوە.

Back to top button