یوسف محەمەد.. ئەو خۆبەكەمزانەی لە هەر پێگەیەكدا بێت، ڕێوییەكی گوێڕایەڵی نەیار و داگیركەرانە!

یوسف محەمەد، ئەو پیاوە بچووكەی بە ماستاوچێتی، لە پاسەوانییەوە خۆی گەیاندە پەرلەمان و دواتریش بە خەڵەتاندنی خەڵكی بەشمەینەتی كوردستان، تاوەكوو ئێستاشی لەگەڵدا بێت، مانگانە لە بەرامبەر چەند قسەیەك بۆ دڵخۆشكردنی دوژمنانی كوردستان، پارەیەكی خەیاڵی دەست دەكەوێت!

دوای ئەو هەموو جاشێتییەی یوسف محەمەد بۆ دوژمنانی كوردستانی كردووە، ئەمڕۆ بۆ چەواشەكردنی خەڵكی، جارێكی دیكە خۆی كردووە بە كوردێكی عەیار ٢٤ و باسی كوردایەتیمان بۆ دەكات! با ئێمە حەق و حیسابێك بكەین بزانین ئەگەر فیكەی حەرامزادە نەبێت، لە چ كاتێكدا یوسف كوردانە هەڵسووكەوتی كردووە تا ئەمڕۆ باسی كوردایەتیمان بۆ بكات؟!

– ئەوكاتەی خەڵكی كوردستان بە شانازی و شەرەفێكی مەزنەوە بەشدارییان لە ڕیفراندۆمدا كرد كە ویستی سەربەخۆخوازیی گەلی كوردستانی بە گوێی جیهان گەیاند، ئەو كوردپەروەرە درۆیینە كە ناوی یوسفە، بۆچی دژی ڕیفراندۆم بوو و بڕ و بیانووی دەهێنایەوە و دەیگوت ڕیفراندۆم بكەین ئێران و توركیا لەناومان دەبەن؟

– لە سەروبەندی خیانەتی ١٦ی ئۆكتۆبەر، بوودەڵەیەكی وەك یوسف محەمەد چ هەڵوێستێكی هەبووە تا ئێستا هەیبێت؟ مەگەر هەر یوسف نەبوو لەوساوە تاوەكوو ئێستاش بە ئەندامێتی لە هاوپەیمانیی هیوای جاشەكان، خزمەت بە تاقمی خۆفرۆش و خیانەتكاری ١٦ی ئۆكتۆبەر دەكات؟

– ئەوكاتەی ئامانج بابانیی و هاوسەر و منداڵەكەی لەنێو سلێمانیدا بە دوو دەمانچە خەڵتانی خوێن كران و دواتریش دادگا كەیسەكەی دیزەبەدەرخۆنە كرد، یوسف وێرا بە وشەیەكیش باسی ئەو كەیسە بكات و بڵێت ئەوە تاقمە خۆفرۆشەكە بوون ئەو خێزانەیان لەناو برد و تۆمەتیشیان بۆ قوربانییەكە هەڵبەست گوایە خۆی ژن و منداڵەكەی و دواتر خۆیشی كوشتووە!

– لە مانگی نیسانی ٢٠٢٠ كاتێك مستەفا سەلیمی كە بەندكراوێكی هەڵاتووی بەندیخانەیەكی ئێران بوو (لەسەر كوردایەتی زیندانی كرابوو)، پەنای بۆ كوردستان هێنا و خیانەتكارانی ١٦ی ئۆكتۆبەر لە پێنجوێنەوە رادەستی ئێرانیان كردەوە و لە ٤ی هەمان مانگدا لەسێدارەدرا، كوردایەتییەكەی یوسف محەمەد لە كوێ بوو؟ ئایا وێرای بە وشەیەكیش بەرگری لەم ڕۆڵە زوڵملێكراوەی گەلەكەی بكات؟ 

– لە مانگی ١٢ی ساڵی ٢٠٢٠ زیاتر لە ١٠ خۆپیشاندەر بە دەستی پیاوەكانی لاهوڕ جەنگی لە زۆنی ملەوەن كوژران، یوسف بوێری هەبوو بڵێت ئەوانەی ئێوە دەیانكوژن، ڕۆڵەی خێرلەخۆنەدیوی زۆنەكەن و لە سایەی دزی و گەندەڵی و قاچاخچێتیی تاقمە خۆفرۆشەكەوە توڕەن و ڕژاونەتە سەر شەقام!

– مەگەر یوسف هەمان ئەو كەسە نییە كاتێك دەیویست كودەتا بەسەر یاسا و دیموكراسیدا بكات لە پەرلەمانی كوردستانەوە، كونسوڵی ئێرانی بۆ كودەتاكەی بانگهێشتی كۆبوونەوەی پەرلەمان كردبوو؟ 

– ئەو كاتەی یوسف سەرۆكی پەرلەمانی كوردستان بوو، پیرۆزبایی یادی دامەزراندنی پەكەكەی كرد و كونسوڵی توركیا لێی توڕە بوو، كوردایەتییەكەی یوسف لە كوێ بوو كە پەیامی بۆ كونسوڵی توركیا نارد و داوای لێبووردنی كرد و بەڵێنیدا ”جارێكیتر دووبارە نابێتەوە“!.

ئەم نموونانە و دەیانی دیكە، پێمان دەڵێن یوسف محەمەد هەمان ئەو جاشەیە كە لە دەسەڵات و ئۆپۆزسیۆندا بێت، لە پەرلەمانی كوردستان بێت یان لە بەغدا، ڕێوییەكی گوێڕایەڵی نەیار و داگیركەرانی كوردستان و پاسەوانی بەرژەوەندییەكانیانە، بۆیە با بۆ خۆهەڵكێشان و چەواشەكردنی خەڵكی، هیچ هەوڵێك نەدات، چونكە بێسوودە، هەموان دەیناسین!

بەختەوەر سەپان

Back to top button