یەكگرتوو بۆ بەختیار شاوەیس: ئەگەر بوێرن و مەردن فەرموون بە كردار ڕووبەڕووی توركیا ببنەوە

((خۆر))

یەكگرتوو وەڵامی پەرلەمانتارێكی یەكێتی دەداتەوە و پێی دەڵێت ”ئەگەر ئازا و بوێر و مەردن، فەرموون بە كردار ڕووبەڕووی توركیا ببنەوە“. 

بەختیار شاوەیس، پەرلەمانتاری یەكێتی، هێرش دەكاتە سەر یەكگرتووی ئیسلامی و بە ترسنۆك ناویان دەبات. لە كاتێكدا حزبەكەی خۆی لە ساڵی ٢٠١٨ەوە لە ژێرەوە ڕێككەوتنی لەگەڵ توركیا هەیە.

لە بەرامبەردا هاوراز شێخ ئەحمەد، پەرلەمانتاری پێشووی یەكگرتوو رای گەیاند، جێگەی شه‌رمه‌زارییه‌ بەختیار شاوەیس قسه‌یه‌كی له‌و شێوه‌یە ده‌كات، هه‌ندێك كه‌س بۆ خۆده‌رخستن و بۆ ئه‌وه‌ی قسه‌ له‌سه‌ر هەموو شتێك بكەن، قسه‌ ده‌كەن، تاوەكوو پێی بڵێن ئازایه‌، ئەو كاتەی یەكگرتوو هەڵوێستی هەبووە، حزبەكەی بەختیار شاوەیس بەو هەموو دەسەڵاتەیەوە كە هەیبووە، ئەوەندە هەڵوێستی نەبووە. 

ڕوونیشی كردەوە، هه‌ر كه‌سێك یه‌كگرتووی ناسیبێت، ده‌زانێت كه‌ حزبێكە هه‌ڵوێستی ڕوون و ڕاشكاوی هەیە، یه‌كگرتووه‌كان به‌ ته‌واوی ئازادن لە دەربڕینی بیروباوەڕی خۆیان، كاتێك كاك ئەبوبەكر هەڵەدنی لێدوانێكی داوە، بۆچوونێكی ئازادانەی خۆی دەربڕیوە كە بەلای یەكگرتووەوە جێگەی ڕێزە، بەڵام حزب خاوەنی سیاسەت و قسەی خۆیەتی. 

پەرلەمانتارەكەی پێشووی یەكگرتوو دووپاتی كردەوە: ”خەڵكی تێگەیشتوون، من حزبی خۆم دەناسم و ئەویش حزبەكەی خۆی ده‌ناسێت، ئه‌م بابه‌تانه‌ لە نێو یه‌كگرتوودا به‌ حه‌كیمانه‌ و ورده‌كارییەوە قسه‌ی له‌سه‌ر ده‌كرێت، حزبێك نین چاومان له‌ خه‌ڵكی خۆمان سوور بكه‌ینه‌وه‌، خه‌ڵك یه‌كگرتوو ده‌ناسێت، بەڵام خه‌ڵكێك له‌ زۆرنه‌كه‌ی ئەو و له‌ سنووری ده‌سه‌ڵاتی ئەواندا به‌ پراكتیك زۆر شت ده‌كه‌ن، كه‌چی به‌ لێدوانێكیش ناوێرێت باسی بكات، بگرە دێت به‌ پێچه‌وانه‌ی واقیعی ده‌سه‌ڵاتی خۆی قسه‌ دەكات، ئێمە بەم جۆرە نین و لەگەڵ خەڵكی خۆمان راستگۆین“. 

پەرلەمانتارەكەی پێشووی یەكگرتوو بە بەختیار شاوەیس دەڵێت: ”ئەگەر ئازاد و بوێریت و مەردن، بە كردار بەرامبەر بە توركیا بوەستنەوە، نەك لەسەرەوە قسە بكەن و لە ژێرەوەش شتیتر بكەن و فێڵیش لە خەڵك بكەن“.

Back to top button